ގާފަރު ކައުންސިލްގެ އިދާރާ

ގާފަރަކީ މާލެއަތޮޅުގައި ހިމެނޭ އެހެން ރަށްރަށާއި އަޅާބަލާއިރު މާލެއާއި ދުރުގައި އޮންނަ ރަށެކެވެ. ބިމުގެ ބޮޑުމިނުން ބަލާނަމަ، އަތޮޅުގެ އެހެން ރަށްތަކާ އަޅާބަލާއިރު ނިސްބަތުން ކުޑަ ރަށެކެވެ. ނަމަވެސް، ރަށާ ގުޅިފައިވާ ބުރުލު ފަޅަކީ މުޅި ދިވެހިރާއްޖޭގައިވެސް ފާހަގަކޮށްލެވޭ، ޤުދުރަތީ މުއްސަނދިކަމުން ފުރިގެންވާ ބޮޑު ފަޅެކެވެ. މާލެއިން ފުރައިގެން ސްޕީޑް ލޯންޗެއްގައި ގާތްގަނޑަކަށް އެއް ގަޑިއިރުގެ ތެރޭގައި ވާސިލުވެވޭ މި ރަށަކީ، ޒަމާނުއްސުރެ މަސްވެރިކަމުގައި ފާހަގަކޮށްލެވޭ ރަށެކެވެ. މީގެ އިތުރުން، ފަހަކަށް އައިސް ފަތުރުވެރިކަމުގެ ދާއިރާއިންވެސް އަވަސް ދުވެއްޔެއްގައި ކުރިއަރަމުން އަންނަ ރަށެއްގެ ގޮތުގައި ގާފަރު ފާހަގަކުރެވެއެވެ.